"Korrupsiya – Yashirin Dushman, Ochiq Jarohat"

"Korrupsiya – Yashirin Dushman, Ochiq Jarohat"
Korrupsiya – bu nafaqat noqonuniy pul olish, balki xalq ishonchini sotishdir. Bu – kelajakni talon-toroj qilish, odamlarning orzularini bir hovuch pulga sotishdir. Dunyoda urushlar, epidemiya va tabiiy falokatlar mavjud. Lekin korrupsiya – insoniyatning oʻzi yaratgan eng sirli va xavfli dushmanidir. U oʻq otmaydi, lekin minglab bolalarning ta’lim olish huquqini oʻgʻirlaydi. U qon toʻkmas, ammo kasalxonalarda bemorlarning umidsizlikdan oʻlishiga sabab boʻladi. U binolarni portlatmaydi, lekin jamiyatning poydevorini ichkaridan yeb qoʻyadi.
Korrupsiya – yolgʻon va xiyonatning qonuniy libosidir. Oʻz vazifasini unutgan amaldor, huquqni pulga almashtirgan politsiyachi, adolatni qoʻlga olmagan sudya – bular oddiy odamlar emas, balki xalqga qarshi jinoyatchilardir.
Korrupsiyaning asl qurboni kim?
Albatta bu oddiy odamlardir. Siz va men. Har kuni halol mehnat qilib, soliq toʻlovchi, farzandlarini tarbiyalayotgan ota-onalar. Korrupsiya ular uchun – qoʻshimcha toʻlovlar, past sifatli xizmat va yoʻqolgan imkoniyatlar demakdir.
🔹 Farzandingiz yaxshi maktabga kirolmasa – bu korrupsiya.
 🔹 Yoʻl yomon, maktab binosi qulab tushish arafasida boʻlsa – bu korrupsiya.
 🔹 Kasalxonada dori yetishmasa, shifokor «qoʻl yordami» soʻrasa – bu ham korrupsiya.
Nega biz sukut saqlaymiz?
Chunki qoʻrqamiz. «Men yolgʻiz nimani oʻzgartira olaman?» degan umidsizlikka tushamiz. Chunki tizim bizga: «Bunday boʻlishi kerak» degan illuziyani singdiradi. Ammo tarix shohidki, katta oʻzgarishlar har doim oddiy odamlarning birdamligidan boshlangan.
Korrupsiyaga qarshi kurash – nafaqat davlat, balki har bir ongli fuqaroning burchidir. Har bir jim turgan ogʻiz, har bir koʻz yumgan yurak – bu yashirin jinoyatga koʻmaklashishdir.
Korrupsiyani bir so’z bilan aytganimizda , u – jamiyat tanasidagi uyurma.
Uning yagona davosi – halollik, jasorat va birdamlikdir. Agar biz hozir qoʻlimizdan kelganini qilmasak, ertaga uning ogʻir oqibatlarini farzandlarimiz chekadi.
 
 Muallif: Oʻzbekiston Respublikasi Sanitariya-Epidemiologik Osoyishtalik va Jamoat Salomatligi Qoʻmitasi, Xorazm viloyati boshqarmasi, Xiva shahar boʻlimi korrupsiyaga qarshi kurash boʻyicha mas’ul xodimi Javlonbek Babajanov