ICHAN-QAL’ADA MAShHUR SAN’ATKORGA BAG’ISHLANGAN KO’RGAZMA

Bugun “IchAn-qal’a” Davlat muzey-qo’riqxonasi musiqa bo’limida mashhur san’atkor Komiljon Otaniyozov hayoti va ijodiga bag’ishlangan yangilangan ko’rgazmasi namoyish qilindi. Muzey-qo’riqxona rahbari Sh.Madaminov Mustaqilligimizning 32 yilligi oldidan tashkil etilgan ushbu ko’rgazma buyuk san’atkorga ko’rsatilayotgan hurmat va ehtiromning namunasidir, deb ta’kidladi.
Komiljon Otaniyozovning shogirdlari San’at aka Latipov, kompozitor Qadamboy aka Polvonov, folklorshunos olim Davlatnazar aka Yusupov va boshqalar ustozning chin insoniy fazilatlari, ijodiy faoliyati haqida so’z yuritdilar.
Badiiy havaskorlik jamoalari qatnashchilari Komiljon Otaniyozov talqin qilgan kuy va ashulalaridan ijro etdilar.
- Komiljon Otaniyozovning mashhur inson bo’lganligini shu yerga kelib bildik. Ayniqsa, u kishiga Hindistonda fil sovg’a qilingani va fil ustida dehli ko’chalari bo’ylab kezganini ko’rib, lol qoldik, - deydi Sankt Peterburgdan kelgan sayyoh Nadejda hayratini yashirolmay.